Support Greenland-ip iliuuseqarnissaq upalungaarsimanissarlu kaammattuutigai: Nunarsuaq tamakkerlugu tamat oqartussaaqataanerat illersortigu
USA-p præsidentiata oqariartuutaata Kalaallit Nunaata nunarsuarmi suli oqallisigineqarnera takutippaa. Support Greenland-ip maanna iliuuseqaqqinnissaq kaammattuutigaa.
”Januaarimi sakkutuulersorniarlutik sioorasaarisoqarmat aninguivugut, maannakkulli allatigut
sioorasaarisoqalerpoq. Maannakkorpiaq amerikamiut aningaasaliinikkut qallunaat kalaallillu akornanni
aaqqiaginnginnermik pinngortitsiniarsarinerat assersuutigineqarsinnaavoq. Inuup ataatsip Kalaallit Nunaat
isornartorsiorlugu Nunarpullu sermerujussuaq aqunneqarluarneqanngitsutut oqariartuuteqarnera
maniguuffigissanngilarput,” Uagut – Landsorganisation for Grønlændere i Danmark-imi siulittaasoq Julie
Rademacher oqarpoq.
”Taamaattumik qarasaasialerinikkut kiffaanngissuseqarnissarput pillugu; amerikamiut
sunniuteqarniarsarinerat inuiattut ilisimannittuunissarput pillugu kiisalu inuiaat akornanni
oqallittoqarnerulernissaa pilersaarutigisariaqarpagut – amerikamiut qarasaasialerinikkut pissaanilerujussuit
avaqqullugit aamma”, Julie Rademacher oqarpoq.
”Kalaallit Nunaata kiffaanngissuseqarnera taavalu tamat oqartussaanerat maannakkorpiaq sakkortuumik sioorasaarneqarput. Tamanna immikkut ittumik pinngilaq, nunarsuarmili tamat oqartussaanerannut inatsilerinermullu sioorasaarineruvoq. Ataatsimoornissarput sillimaniarnissarpullu pingaaruteqarput.”
Ukiuni kingullerni Kalaallit Nunaat Danmark-imi tusagassiutitigut eqqartorneqarpiarsimanngilaq.
”Taamaakkaluartorli amerikamiut sunniuteqarniarsarinerat uagut kalaaliulluta ulluinnarni
malugisinnaavarput”, Julie Rademacher oqarpoq.
Nordic Safe Cities-ip qanitsukkunni saqqummiussaa naapertorlugu Kalaallit Nunaanni qinersinerup
kinguneri nunap avataanit annertuumik sunnerneqarsimapput; amerikamiut Facebook-ikkut ikkussisarnerat
assersuutigineqarsinnaavoq.
”Amerikamiut præsidentiata Danmark-ip Kalaallit Nunaatalu akornanni aaqqiaginnginnermik
pinngortitsiniarsarinera uatsinnut malunnarpoq. Taamaakkaluartorli inuiattut tamat
oqartussaaqataanerput; politikkikkut aqutseriaaserput; inatsisilerisarnerput; niuertarnerput;
tusagassiuutittalu kiffaanngissuseqarnerat sequmissanngilai,” Julie Rademacher oqarpoq.
”Nunarsuatsinni politikkikkut aalassattoqarnerani inuiaqatigiiulluta kiffaanngissuseqarnerput kiisalu tamat oqartussaaqataanerput avatitsinnit sunnerneqassanngillat.”
Nutaanerpaat
