Inuit tuusintilikkuutaat Københavnimi qajartoqatigiinnermi peqataasut
Sapaatiummat Københavnip umiarsualiviatigut qajartoqatiittoqarmat inuit tuusintilikkuutaat isiginnaarput. Tassani Erfalasorput takuneqarsinnaasimapput, ilaatigut oqalugiartoqarsimalluni, tusarnaartitsisoqarsimalluni kiisalu qilaatersortoqarsimalluni. Tamanna FN-ip Nunat Inoqqaavisa Ulluanni pivoq.
Kalaallit Nunaat nalliuttorsiorniarlugu Københavnip qeqqani qajartoqatigiit aallartimmata inuit tuusintilikkuutaat Erfalasorput tigummillugu nunamit isiginnaaqataasimapput.
Qajartoqatigiinneq aggustip 9-iani FN-ip Nunat Inoqqaavisa Ulluanni ingerlanneqarpoq. Tassani Julie Rademacher, Support Greenland-imi pisortaq, oqalugiarsimavoq. Julie Rademacher-ip ActionAid Denmark suleqatigalugu qajartoqatigiinneq aaqqissorsimavaa.
Politikeri kalaaleq, Qarsoq Høegh-Dam (N), kalaallisut oqalugiarsimavoq. Oqalugiarnerata kingorna tusarnaartitsisoqarsimavoq kiisalu umiarlummi qilaatersortoqarsimalluni. Erinarsoqatigiit Inuánima, isiginnaartitsisartoq erinarsortartorlu kalaaleq Nukâka Coster-Waldau kiisalu nipilersortartoq Kristoffer Jul tusarnaartitsisimapput.
Qajartoqatigiit uniffianni siullermi Københavnimi Suliffeqarnermut, Akuutitsinermut Inuussutissarsiornermullu borgmesteri, Andreas Keil, oqalugiarsimavoq. Oqalugiarnerup kingorna nipilersortartut kalaallisut tusarnaartitseqqissimapput.
Qajartoqatigiinneq Nordhavn-imi taamaatissimavoq. Tassani tusarnaartitsisoqaqqissimavoq, ActionAid Danmark-imilu generalsekretæri Tim Whyte oqalugiarsimalluni.
”Qaannat kalaallit kulturiannut kinaassusaannullu ilisarnaataapput. Ukiut tuusintilikkuutaat ingerlaneranni Kalaallit Nunaanni inuunermut atassuteqarsimapput. Saniatigut qajartorneq Danmark-imi sunngiffimmi nuannarineqarluartarpoq, maannakkullu Kalaallit Nunaat kalaallillu kulturiat soqutigineqaraluttuinnarput. Taamaattumik qajartornerup inuit ataatsimoortinnerulertarpai, ilaatigut Kalaallit Nunaata Danmarkillu akornanni inuit aamma ataatsimoortinnerulertarlugit.”
Latest Updates
