Københavnimi immap aqqutaatigut angalaqatigiinnermi Nunatta Danmark-illu oqaluttarisaanerat ukkatarineqalertussaasoq
Københavnimi takornariat Nunatta Danmark-illu oqaluttuarisaanerat immap aqqutaatigut maanna paasisaqarfiginerusinnaanngorpaat. Stromma takornariaqarnermut aaqqissuussaq nutaaq aqqutigalugu niuerneq, oqaluttuarisaaneq, kulturi inuillu pillugit takornarianut paasititsiniaasalissaaq.
Angalaqatigiinneq akunneq ataatsimik sivisussuseqassaaq, angalaqataasullu Nunatta Danmark-illu oqaluttuarisaanerat Københavnip umiarsualiviani immallu aqqutaani sumiiffinni assigiinngitsuni paasisaqarfiginerusinnaavaat.
Aggustip 9-ianni 2026 (FN-ip Nunat Inoqqaavisa Ulluanni) Stromma-p Support Greenland aamma ActionAid Denmark suleqatigalugit ”Grønlandsruten – Kalaallit Nunaata Danmarkillu oqaluttuarisaanerat immap aqqutaanit isigalugu” atulersinnikuuaat.
Angalaqatigiinnerup atulersinneqarnera Kalaallit Nunaat nalliuttorsiorniarlugu qajartoqatigiittoqarnerani pivoq. Qajartoqatigiinnermi Københavnip umiarsualiviani inuit Erfalasorput tigummillugu takuneqarsinnaasimapput kiisalu kalaallit kulturiat ukkatarulugu tusarnaartitsisoqarsimallunilu oqalugiartoqarsimavoq.
Københavnip Universitet-iani Kalaallit Nunaat Issittorlu pillugit kiisalu katersugaasivilerinermik ilisimatusartup, Ivalo Olsvig-ip, angalaqatigiinnerup nalaani audio guide (takusassanut nassuiaat) atorneqartussaq allassimavaa.
“Angalaqatigiinnermi audio guide qallunaanut, kalaallinut allamiunullu pissanganartuutinniarlugu paasiuminartuutinniarlugulu sananiarsarisimavara. Danmarkip Kalaallit Nunaatalu oqaluttuarisaanerat inuit, sumiiffiit kiisalu ullutsinni Københavnimi takusassat aqqutigalugit oqaluttuarineqarnissaa siunertarisimavara.”
”Umiarsualivikkooraanni oqaluttuarisaanerup atuakkani allagaateqarfinnilu taamaallaat takussaannginnera takuneqarsinnaavoq. Illuni, eqqumiitsuliani, inuusaliani, oqaatsinilu takuneqarsinnaavoq – sumut qiviassanerluta nalunngikkaangatsigu”
Audio guide Stromma-p app-iatigut – ”City’s Voice”-kkut – kalaallisut, qallunaat tuluttullu pissarsiarineqarsinnaavoq.
Latest Updates
