Tamat oqartussaaqataanerat nalliuttorsiorniarlugu Kalaallit Nunaat Issittorlu festivalimi ukkatarineqartut
Support Greenland Folkemødet 2026-imi Kalaallit Nunaat Issittorlu pillugit paasititsiniaalluni peqataavoq.
Sapaatip akunnera una naalagaaffeqatigiiffiup politikerii, tusagassiortui, inuussutissarsiornikkut pisortai, peqatigiiffii inuinnaallu qeqertaq Bornholm-imi Folkemødet-imi peqataaniarlutik ataatsimoorput. Folkemødet tassaavoq Danmark-imi tamat oqartussaaqataanerat nalliuttorsiorniarlugu ukiumoortumik festivali.
Folkemødet tassaavoq Danmark-imi tamat oqartussaaqataaneratigut ataatsimoorfiit pingaarnerpaasa ilaat. Tassani isummertut inuinnaallu politikki, inuiaqatigiit, kulturi siunissarlu ammasumik oqallisiginiarlugit ataatsimoortarput.
Kalaallit Nunaat Issittorlu pillugit paasititsiniaalluni Support Greenland-ip ukiormanna peqataasinnaasimanini tulluusimaarutigaa.
Festivalernermi Support Greenland eqqumiitsuliorneq, kulturi attaveqaqatigiinnerlu pillugit oqaloqatigiittoqarnerani tapersersuivoq, ilaatigut geopolitikki, sillimaniarneq Issittullu nunarsuarmi pingaaruteqaraluttuinnarnera pillugit oqallinnermi peqataasimalluni.
Support Greenland – Issittumi suleqatit peqatigalugit – Arktis Live-mik aallarneeqataasimavoq. Tassani Kalaallit Nunaata Issittullu periarfissaat ajornartorsiutaalu pillugit eqqartuinissamut ataatsimoorfiliorpugut.
Tamanna saniatigut Support Greenland-imi pisortaq Julie Rademacher festivalernerup nalaani oqaloqatigiinnerni oqallinnernilu assigiinngitsuni peqataasimavoq.
Inuit ataatsimooraangata tamat oqartussaaqataanerat atungaalluartarpoq. Kalaallit Nunaata Issittullu siornatigut misiginikuunngisatsinnik nunarsuatsinni ukkatarineqarneranni Folkemødet-ip immikkuullarissumik oqaloqatigiinnermik pinngortitsivoq. Kalaallit Nunaata kalaallillu namminneq aalajangiisinnaatitaanerat nukittorsarniarlugu oqaloqatigiinnerni peqataanissarput, paasititsiniaanissarput inuiaqatigiillu assigiinngitsut akornanni ataatsimoortitsinissarput pisariaqarluinnarpoq.
Folkemødet inuit tuusintilikkuutaat Danmark-imeersunit, Kalaallit Nunaanneersunit Savalimmiuneersunillu aqqusaarneqarnissaa ilimagineqarpoq.
Support Greenland oqallinnerni peqataanissaminut kiisalu Kalaallit Nunaata Issittullu isiginnittaasaat tamat oqartussaaqataaneratigut ataavartumik pingaaruteqarnissaannik nukittorsaaqataanissamut qilanaarpoq.
Latest Updates
