Kalaallit Nunaat pillugu paasissutissat sisamat
Kalaallit Nunaat tassaavoq nuna nammineq innuttaasuminit, oqaluttuassartaminit kulturiminillu ilusilersugaq. Pinngortitap pisuussutaata Kalaallit Nunaatalu nunarsuarmi politikkikkut oqallisigineqartarnerisa saniatigut Kalaallit Nunaat nunaavoq tamat oqartussaaneratigut imminik aqutsisoq: Kalaallit kinaassusaat inooqatigiinnerallu tunngavigalugit nuna atugarissaarfiusoq.
Kalaallit Nunaat pillugu paasissutissat pingaaruteqartut sisamat uani atuarsinnaavatit:
Nunat inoqqaavisa – kalaallit – Kalaallit Nunaat aquppaat: Kalaallit Nunaata innuttaasui 90%-iat tassaapput Inuit (kalaallit). Kalaallit Nunaat nunat inoqqaavinit aqunneqarnera nunarsuatsinni immikkuullarissuuvoq, kalaallillu pisinnaatitaaffii FN-ip Nunat Inoqqaavisa Pisinnaatitaaffii pillugit Nalunaarutaannit tapersersorneqarlutik.
Tamat oqartussaaneratigut aqutsineq: Kalaallit Nunaanni 1979-imi Namminersornerullutik Oqartussat (Hjemmestyre) pinngortinneqarput, 2009-milu Namminersorlutik Oqartussat (Selvstyre) pinngortinneqarsimallutik. Kalaallit Nunaat Inatsisartoqarlunilu Naalakkersuisoqarpoq, oqaatsillu pisortatigoortumik atorneqartartut tassaallutik kalaallit oqaasii. Kalaallit Nunaat politikkikkut nammineq aqutsisuuvoq, akileraarutit, ilinniarneq, peqqinnissaqarfik taavalu pinngortitap pisuussutaat nammineq aquttarlugit.
Nuna atugarissaarfiusoq: Kalaallit Nunaanni innuttaasut tamarmik akeqanngitsumik katsorsartissinnaapput, universitetimi ilinniarsinnaapput taavalu ikiorserneqarsinnaallutik. Nunat immikkoortui USA-mit pigineqartunut naleqqiullugu Kalaallit Nunaanni innuttaasut atugarissaarnerusarput – Puerto Rico-mut, Guam-imut, American Samoa-mut taavalu Northern Mariana Islands-imut naleqqiullugu.
Inooqatigiinneq: Kalaallit Nunaat 56.000-inik innuttaasoqarpoq. Saniatigut kalaallit 17.000-it missaanniittut Danmark-imi najugaqarput – kalaallit sisamaasuni ataaseq Danmark-imi najugaqarpoq. Qallunaanik suleqateqartarput, ikinnguteqartarput ilaqutaqartarlutillu.
Kalaallit Nunaata Danmark-illu innuttaasui imminnut ungasinngillat: Oqaluttuarisaanikkut, suleqatigiittarnikkut inooqatigiinnikkullu ataqatigiipput.
Nutaanerpaat
